BWF VICTOR Korean Open ah India Shuttler SINDHU a thiamber

17^th September, 2017

Dt. 12-17 September, 2017 chhunga SK Handball Stadium, Songpa – Gu, Seoul, Korea a neih zawh tak BWF Vicktor Korean Open-ah India hmeichhe shuttler ropui Pusarla V Sindhu chuan Womens Singles category Final ah Nozomi hnehin a champion.

He Open ah hian Sindhu hi seeded no. 5 niin round hmasaber ah CHEUNG Nang Yi nen inkhelin awlsam takin 21-13 leh 21-8 in a chak a, round dawt lehah hian Nitchaon JINDAPOL tum lehin game ah inthlau viau lo mahse, India shuttler zawkin chakna chang lehin 22-20 leh 22-17 a chak lehin Quarter Final a in hlang kai a. Quarter Final ah hian Minatsu MITANI hmachhawn lehin game hmahruaiah an in hnehtawk hle a, game a zawh meuh chuan India shuttlers zawkin vanneihna changin 21-19 in game a la, game hnihnaah Minatsu rawn insiamtha in game a rawn ti danglam hle a, 21-16 a game rawn la ve thungin final game khelh a ngai ta. Game khelh leh nghal a ni a, Sindhu in game rawn thunun chhunzawmin point ah pawh chungnung zawkin game a tawp leh meuh chuan 21-10 a chakna changin Open Semi Final a in vaw thleng ta a ni.

Semi Final ah hian Sindhu chuan Open Seeded no. 6 HE Bingjiao tum lehin game khatnaah awl zatein Sindhu hian 21-10 in game a la a, game laihawl ah erawh Bingjiao in 21-17 in game a rawn la ve thung. Final game khelh leh a ni a, Sindhu in tan rawn thawh lehin game a thunun chhunzawm a, game a tawp meuh chuan 21-16 a chakna changin Final a in vaw thleng ta a ni.

Final ah hian Sindhu hian Japan player leh tun open a seeded no. 8 Nozomi OKUHARA nen a hmachhawn leh a, game hmahruaiah an in hnehtawk hle a, point ah pawh an in thlau viau lo a, game a tawp meuh chuan India Shuttler in 22-20 in game a la a. Game hnihna chhunzawm niin Japan shuttler in game a rawn ti danglam a, game hmahruaitu niin a tawp thlengin chakna a chang a, 21-11 in game a rawn la ve leh. Final game khelh nghal a ni a, an in hnehtawkin chak zawk tur hriat thiam har khawpin an in nawr tawn a, point ah pawh chungnung zawk awm hlei thei lo mahse, India shuttler ropui zawkin game a zawh meuh chuan BWF VICTOR Korean Open Womens Singles champion ni turin PV Sindhu chuan 22-18 game a la ta a n.